Кыргызстандык сарымсактын алгачкы партиясы АКШга жөнөтүлдү

Кыргызстандан АКШнын рыногуна сарымсактын алгачкы контейнери жөнөтүлдү. Бул тууралуу Жемиш өстүрүүчүлөр ассоциациясынын жетекчиси Тилек Токтогазиев «Жашыл чай» подкастында билдирди.

Анын айтымында, партия учурда АКШда болуп, бажылык тариздөө процессинен өтүп жатат.

Токтогазиевдин маалыматына караганда, мындай келишимдер сарымсак өндүрүү менен алектенген ири америкалык компания менен жүргүзүлгөн сүйлөшүүлөрдөн кийин түзүлгөн.

«Эми биздин сарымсак Америкада. Алгачкы контейнерди жөнөттүк, учурда ал физикалык жактан Америкада, бажылык тариздөөдөн өтүп жатат», – деди ал.

Анын айтымында, америкалык тарап продукцияны сатып алууга гана эмес, кыргызстандык фермерлер менен кызматташууга да кызыкдар.

Тактап айтканда, өндүрүүчүлөрдүн чыгымдарынын бир бөлүгүн каржылоо жана сатып алуу баасын алдын ала макулдашуу мүмкүнчүлүгү талкууланууда.

Токтогазиев кыргызстандык сарымсактын артыкчылыгы анын даамдык сапаттарында болушу мүмкүн экенин белгиледи. Ошол эле учурда негизги тоскоолдуктардын бири – продукцияны Кыргызстандан АКШга жеткирүүнүн кымбаттыгы бойдон калууда.

Ал алгачкы партиядан кийин АКШга сарымсак жеткирүүнүн көлөмүн көбөйтүүгө мүмкүнчүлүк болоруна үмүт билдирди.