Кыргызстандык балбан АКШда өтүп жаткан дүйнө чемпионатында (U23) коло медаль утту

Кыргызстандык спортчу Кубаныч Арынов АКШнын Лас-Вегас шаарында өтүп жаткан 23 жашка чейинкилер (U23) арасындагы спорттук күрөш боюнча дүйнө чемпионатында коло медалга ээ болду. Бул тууралуу Дене тарбия жана спорт мамлекеттик агенттигинен кабарлашты.

Кубаныч Арынов грек-рим күрөшү боюнча 60 кг салмак чен бирдигинде күч сынашып, эрктүүлүгүн жана жогорку чеберчилигин көрсөттү.

кыргызстандык балбан мелдешти 1/8 финалда  ишенимдүү баштап, АКШ өкүлү Максвелл Хоппер Блэкти 64 секунддун ичинде 8:0 эсеби менен таза жеңди.

Чейрек финалда Азербайжан балбаны Элмир Алиевге упай айырмасында (4:7) утулуп калды. Азербайжандык спортчу финалга чыккандыгына байланыштуу, мекендешибиз көңүл жубатуучу беттеште күч сынашууга мүмкүнчүлүк алды.

Көңүл жубатуучу беттеште Польшанын өкүлү Оливье Томаш Скшипчакты 9:0 эсеби менен мөөнөтүнөн мурда жеңди.

Коло медаль үчүн кармашта өзбекстандык Мехрож Бахрамовду 1 мүнөт 51 секундасында далысын жерге тийгизип (туше), жеңишке жетти.