"Формула-1": Эмне үчүн Ван Дамм жана башка коноктор келген эмес?

Кыргызстандын Суу-мотор спорт федерациясынын техникалык көзөмөл боюнча адиси Элдияр Манап "Кабар" агенттигинде өткөн маалымат жыйынында "Формула-1" иш-чарасына чет элдик жылдыздардын келбей калганына байланыштуу жагдайды түшүндүрдү.

Анын айтымында, чет элдик белгилүү инсандардын иш-чарага катышары тууралуу маалымат ойдон чыгарылган эмес. Федерацияда алардын Кыргызстанга келиши боюнча расмий каттар, кат алышуулар жана видеотастыктоолор бар.

Ал белгилегендей, чакырылган коноктордун бири Казакстанда тасма тартууга байланыштуу Кыргызстанга келе алган эмес. Федерациянын өкүлүнүн айтымында, уюштуруучулар анын жол кире жана башка чыгымдарын жабууга даяр болушкан, бирок тасма тартуу графигин өзгөртүп, иш-чарага келүүсүн камсыз кылуу мүмкүн болгон эмес.

Ал эми Жан-Клод Ван Даммдын келбей калганы боюнча төмөнкүлөрдү билдирди.

"Актёрдун сапардан баш тартканы учууга болжол менен 6 саат калганда белгилүү болуп, буга анын ден соолугу себеп болгон. Биз учууга 6 саат калганда анын ден соолугуна байланыштуу баш тартканын билдик. Бул жагдай биз үчүн да абдан жагымсыз болду", - деди адис.

Ошентип, Элдияр Манап Кыргызстандын Суу-мотор спорт федерациясынын өкүлүнүн айтымында, чет элдик конокторду иш-чарага чакыруу чындап эле пландалганын белгиледи. Бирок алардын катышуусу уюштуруучулардан көз каранды болбогон себептерден улам ишке ашпай калды.