Кыргызстанда аялын ур-токмокко алгандарды эки жылга чейин эркинен ажыратуу сунушталууда

Кыргызстанда үй-бүлөлүк зомбулук үчүн жоопкерчиликти күчөтүү сунушталууда. Тиешелүү мыйзам долбоору коомдук талкууга коюлду.

Документке ылайык, үй-бүлөдө физикалык зомбулук көрсөтүү Укук бузуулар жөнүндө кодекстин 70-беренесинде өзүнчө бөлүк катары каралышы мүмкүн. Эгерде жасалган аракеттерде кылмыштын белгилери жок болсо, 7 күндөн 14 күнгө чейин камакка алуу жазасы сунушталууда.

Учурда аталган берене боюнча физикалык, психологиялык жана экономикалык зомбулук, физикалык зомбулук көрсөтөм деп коркутуу жана үй-бүлөлүк зомбулуктун башка түрлөрү үчүн бирдей жоопкерчилик каралган. Колдонуудагы мыйзамга ылайык, 40 саат коомдук жумуштарга тартуу же үч күндөн жети күнгө чейин камакка алуу жазасы белгиленген.

Ошондой эле Кылмыш-жаза кодексине өзгөртүүлөрдү киргизүү сунушталууда. Ага ылайык, ден соолукка жеңил залал келтирүүгө алып келген үй-бүлөлүк зомбулук 177-беренеде өзүнчө кылмыш курамы катары каралышы мүмкүн. Мындай аракет үчүн 40 сааттан 100 саатка чейин коомдук жумуштарга тартуу же эки жылга чейин эркинен ажыратуу жазасы сунушталууда.

Мындан оор кесепеттерге алып келген зомбулук үчүн жоопкерчиликти күчөтүү каралууда. Жазаны оорлотуучу жагдайларга эки же андан көп адамга, жашы жете элек балага, кош бойлуу аялга же алсыз абалдагы адамга карата зомбулук көрсөтүү, курал колдонуу, өзгөчө ырайымсыздык, зомбулукту кайталап жасоо жана мас абалында кылмыш жасоо киргизилиши мүмкүн.

Мындан тышкары, милиция кызматкерлерине үй-бүлөлүк зомбулук болгон жерде адамдын куралын дароо алып коюу укугун берүү сунушталууда. Курал бир айга чейин алынат, андан кийин соттук көзөмөл жүргүзүлөт. Сот бул мөөнөттү үч айга чейин узарта алат.

Ошондой эле адам жабырлануучунун же башка адамдардын өмүрүнө жана ден соолугуна реалдуу коркунуч жаратууну улантса, аны кармоо мөөнөтүн 48 саатка чейин узартууга уруксат берүү сунушталууда.

Мыйзамдарды катаалдаштыруу зарылдыгы үй-бүлөлүк зомбулук боюнча кайрылуулардын көбөйүшү менен түшүндүрүлүүдө. Ички иштер министрлигинин маалыматына ылайык, 2023-жылы үй-бүлөлүк зомбулук фактылары боюнча 14 миң 20 кайрылуу катталган. 2024-жылы бул көрсөткүч 18 миң 81ди, ал эми 2025-жылы 23 миң 516ны түзгөн. Үч жыл ичинде кайрылуулардын саны 67,7%га өскөн.