Кыргызстандын хоккей боюнча жаштар курама командасы (U-20) катары менен үчүнчү жеңишке жетти

Хоккей боюнча Кыргызстандын жаштар курама командасы (U-20) Бишкек шаарында өтүп жаткан үчүнчү дивизиондун (В тайпасы) дүйнө чемпионатында ишенимдүү оюн көрсөтүүнү улантууда.

21-январда турнирдин үчүнчү айлампасынын алкагында Кыргызстандын курама командасы Ирандын курамасы менен беттешип, 15:1 эсебинде ири жеңишке жетишти. Биринчи бөлүктө 8:0 эсебинде алдыга чыкты.

Бул беттеште Алихан Али-Аскаров төрт шайба, Умар Эгембердиев менен Егор Лещенко үчтөн шайба киргизүү менен айырмаланды.

Үч айлампанын жыйынтыгында Кыргызстандын жаштар курама командасы 9 упай топтоп, турнирдик жадыбалда ишенимдүү түрдө биринчи орунду ээледи.

Оюндун жыйынтыгы:

Кыргызстан – Иран – 15:1 (8:0, 3:0, 4:1).

Бүгүн, 22-январда, саат 20:00дө Кыргызстандын курамасы Люксембургдун курама командасына каршы ойнойт.