Кендирбаева: Билим берүү системасы болуп көрбөгөндөй колдоого ээ болууда

Кыргызстандын билим берүү системасы мамлекет тарабынан болуп көрбөгөндөй колдоого ээ болууда. Айлык акылардын жогорулашы жана жаңы социалдык чаралардын киргизилиши менен мугалимдик кесиптин кадыр-баркы жана жагымдуулугу өсүп жатканын агартуу министри Догдуркүл Кендирбаева билдирди.

Анын айтымында, айлык маянанын көбөйүшү билим берүү тармагында иштөөнү каалагандардын санын арттырышы керек.

Мисал катары министр Бишкек шаарындагы эмгек стажы жок жаш мугалимди келтирди. Анын айтымында, толук ставкада иштеген мындай педагог айына болжол менен 35 миң сом айлык ала алат.

Кендирбаева ошондой эле президенттин тапшырмасы менен мугалимдерди колдоого багытталган комплекстүү чаралар ишке ашырылып жатканын белгиледи. Айлык акыны жогорулатуудан тышкары, быйыл 500 орундуу мугалимдер үчүн ден соолукту чыңдоо борборунун курулушу башталат. Мындан сырткары, педагогдорду ноутбуктар менен камсыздоо жана жеңилдетилген насыя берүү программаларын кеңейтүү пландалууда.

«Мындай комплекстүү колдоо дүйнөдө бар-жогун билбейм. Балким, биз постсоветтик өлкөлөрдү эле эмес, бүтүндөй дүйнөнү алдыга сүрөп келе жаткандырбыз», — деди министр.

Анын айтымында, мугалимдерге көрсөтүлүп жаткан кеңири колдоо өлкөдө жүргүзүлүп жаткан билим берүү реформалары менен катар жүрүп, окутуунун сапатын жогорулатууга жана мугалимдик кесиптин аброюн көтөрүүгө багытталган.