Кыргызстанда жогорку окуу жайларга кабыл алуу кампаниясынын үчүнчү туру башталды

Кыргызстанда жогорку окуу жайларга кабыл алуу кампаниясынын үчүнчү туру башталды. Абитуриенттерди каттоо «Абитуриент Online» автоматташтырылган маалыматтык системасы аркылуу 29-июль саат 14:00гө чейин уланат.

Алгачкы эки турдун жыйынтыгы боюнча 61 миңден ашык электрондук талон катталган. Алардын ичинен 21,6 миңге жакыны бюджеттик орундарга, 39,5 миңден ашыгы келишимдик негизде окууга тапшырылган.

Тандоо жыйынтыгында ЖОЖдор 41,6 миң абитуриентти кабыл алууга сунуштаган. Алардын ичинен 30 миңден ашуун адам окууга макулдугун берген. Анын ичинде 23,7 миңи контракттык негизде, 6,4 миңи гранттык орундар боюнча окууга өткөн.

Абитуриенттер арасында эң көп суроо-талапка ээ болгон багыттар — педагогика жана гуманитардык адистиктер, экономика жана каржы, медицина, маалыматтык технологиялар жана юриспруденция.

2026-жылы кабыл алуу кампаниясы жалпысынан беш этапта өтөт. Абитуриенттер үчүн 10 миңге жакын бюджеттик (гранттык) орун каралган.