Агартуу министрлиги мугалимдер эмгек өргүүсүнөн чакыртылууда деген маалыматты төгүндөйт

Агартуу министрлиги мугалимдер эмгек өргүүсүнөн чакыртылууда деген маалыматты төгүндөйт.

Министрликтин билдирүүсүнө караганда, министрлик азыркы учурда «Санарип Кампа» жана «Э-Күндөлүк» санариптик платформаларын колдонуу боюнча окутуу семинарларын өткөрүүдө.

Бул иш-чаралардын максаты – билим берүү уюмдарынын жетекчилеринин санариптик компетенцияларын өнүктүрүү, заманбап технологияларды киргизүү жана окуу процессин башкаруунун натыйжалуулугун жогорулатуу.

Семинарлар өлкөнүн 30дан ашык районун камтып, Балыкчы, Каракол, Нарын, Жалал-Абад, Баткен, Ош жана Өзгөн шаарларында өтүп жатат. Семинарларга райондук/шаардык билим берүү бөлүмдөрүнүн жетекчилери, ошондой эле мектеп директорлору гана катышып жатышат.

Мугалимдер бул иш-чараларга катышкан да, эмгек өргүүсүнөн чакыртылган да жок.