Айдоочулардын эсине! Ашууларга кар көчкү түшүү коркунучу бар

Өзгөчө кырдаалдар министрлиги аба ырайына байланыштуу шашылыш билдирүү таратып, алыс жолго аттанган айдоочуларды этият болууга чакырды. 

Маалыматка ылайык, 21нен 24-январга чейин күтүлүп жаткан жаан-чачынга байланыштуу Кыргызстандын тоолуу райондорунда, тактап айтканда:

• Бишкек – Ош унаа жолунун 121-138-чакырымдарындагы Төө-Ашуу, 198-255-чакырымдарында Ала-Бел ашуусу, Чычкан капчыгайы;
• Ала-Бука – Каныш-Кыя унаа жолунун 68-74, 86-101-чакырымдарында Чапчыма ашуусу, Красная-Горка – Ак-Таш унаа жолунун 0-3 чакырымдарында;
• Мырзаке – Кара-Кулжа – Алайкуу унаа жолунун 65-110 чакырымдарында;
• Каракол – Эңилчек унаа жолунун 45-90-чакырымдарында Чоң-Ашуу ашуусуна;
• Балыкчы – Казарман – Жалал-Абад унаа жолунун 326-349-чакырымдарында Көк-Арт ашуусуна кар көчкү түшүүcү жана кар күрткүсү күтүлөт.

Мындан улам жолдор тайгак болуп, муз тоңот. Унаалардын ортосундагы 500 метр аралык кыймыл чектелиши зарыл.