Жогорку сотто чыныгы соттук билдирүүнү алдамчылардын билдирүүсүнөн кантип айырмалоо керектиги түшүндүрүлдү

Кыргызстандын жарандарына расмий соттук билдирүүнү алдамчылар жөнөткөн билдирүүдөн кантип айырмалоо керектиги түшүндүрүлдү. Бул тууралуу Жогорку соттун Аппарат жетекчисинин орун басары Аман Жумалиев «Биринчи радионун» «Кыргызстан» программасынын эфиринде билдирди.

Анын айтымында, сот тутумунун расмий билдирүүлөрү sot.kg доменинин атынан жөнөтүлөт.

Билдирүүдө соттун аталышы, отурум өтө турган күн жана убакыт, ошондой эле кабинеттин номери так көрсөтүлүшү керек.

Жумалиев расмий соттук билдирүүлөрдө башка сайттарга алып баруучу шилтемелер болбошу керектигин белгиледи.

Шектүү шилтемелерди камтыган же белгисиз байланыштардан мессенжерлер аркылуу келген билдирүүлөр соттук кабарлоонун расмий тутумуна кирбейт.

Жогорку сот жарандарды билдирүүнүн булагын кылдат текшерүүгө чакырды. Анткени электрондук кабарлоонун жаңы тартибин шылуундар жасалма соттук чакыруу кагаздарын жөнөтүү үчүн колдонушу мүмкүн.