Бишкекте көмүрдүн баасы тоннасына 7 миң сомго чейин кымбаттады

Бишкектеги социалдык отун базаларында алдыдагы жылытуу сезонунда көмүрдүн баасы тоннасына 7 миң сомго чейин белгиленди. Бул тууралуу «Кыргызкөмүр» ААКнын башкы директору Рустамбек Садыралиев «Sputnik Кыргызстан» радиосунун эфиринде билдирди.

Анын айтымында, былтыр борбор калаада Кара-Кече көмүрүнүн белгиленген баасы тоннасына 6,6 миң сом болгон. Демек, быйыл көмүрдүн баасы 400 сомго же болжол менен 6%га өстү.

Садыралиев баанын жогорулашын көмүр казып алуу жана аны ташууга кеткен чыгымдардын көбөйүшү менен түшүндүрдү.

7 миң сомдун ичинен болжол менен 3 миң сому Кара-Кече кениндеги көмүрдүн өздүк баасына туура келет. Калган сумма көмүрдү ташуу, отун базасын кармоо, жүктөө, эмгек акы жана башка чыгымдарга жумшалат.

Ошол эле учурда көмүрдүн баасы кен менен конкреттүү калктуу конуштун ортосундагы аралыкка жараша өзгөрөт. Ошондуктан бардык аймактар үчүн бирдиктүү тариф жок.

Компаниянын жетекчисинин маалыматына караганда, социалдык отун базалары үчүн белгиленген баалар чектүү баа болуп саналат. Башкача айтканда, көмүрдү белгиленген суммадан жогору баада сатууга болбойт.

Ал ошондой эле жеке унаалардын Кара-Кече кенине түз кирүүсүнө чектөө киргизилгенин белгиледи. Көмүрдү расмий социалдык отун базаларына жеткирүүчү транспорт каражаттарына гана жүктөөгө уруксат берилет.

Садыралиевдин айтымында, мындай система көмүрдү кымбат баада кайра сатып, сатууга жол бербөөгө багытталган.