Бишкекте өлкөнүн башкы жаңы жылдык балатысын жандыруу аземине 10 миңден ашуун адам катышты

Кечээ Бишкек шаарындагы «Ала-Тоо» борбордук аянтында өлкөнүн башкы жаңы жылдык балатысын жандыруу салтанаттуу аземи өтүп, ага шаар тургундары жана борбор калаанын конокторунан 10 миңден ашуун адам катышты.

Иш-чара учурунда коомдук тартипти жана жарандардын коопсуздугун камсыз кылуу үчүн ички иштер органдарынын 1000ден ашуун кызматкери тартылды. Милиция кызматкерлери күчөтүлгөн тартипте кызмат өтөп, майрамдык иш-чара өтүп жаткан аймакта коомдук тартипти камсыз кылышты.

Иш-чаранын жүрүшүндө алты жашы жете элек баланын жоголгондугу катталган. Милиция кызматкерлеринин ыкчам жана оперативдүү аракеттеринин натыйжасында бардык балдар кыска убакыттын ичинде табылып, аман-эсен ата-энелерине өткөрүлүп берилди.

Жалпысынан майрамдык иш-чара тынч жана коомдук тартипти бузуу фактылары аныкталган жок.