Баасы 800 миңден ашат. Японияда "адамдар үчүн муздаткычтар" сатыкка чыкты

Японияда адамдарды ысыктан жана ысык уруудан коргоого арналган жеке муздатуучу Do Hiemon Box кабиналары сатыкка чыкты. Сырткы көрүнүшү чоң муздаткычты же соода автоматын элестеткен бул түзүлүштүн ичине адам кирип отура алат.

Кабинанын ичинде температура +15 градустан жогору көтөрүлбөйт. Адам ичине кирип отургандан кийин система анын башына, моюнуна, ийинине жана белине болжол менен +5 градус температурадагы муздак абаны багыттайт. Өндүрүүчү бул аппарат бүт денени тез муздатууга жардам берерин белгилейт.

Муздатуунун таасири беш мүнөттөн кийин эле байкала баштайт. Иштеп чыгуучулардын эсептөөсү боюнча, кабинада он мүнөт болуу ысык шартта иштегенден кийин организмдин калыбына келишине жардам берет.

Түзмөктө муздатуунун үч режими каралган. Адамдын денеси ашыкча муздап кетпеши үчүн система 20 мүнөттөн кийин автоматтык түрдө өчөт.

Кабина кадимки электр тармагынан иштейт жана татаал орнотууну талап кылбайт. Дөңгөлөктөрү болгондуктан аны ар кандай объектилерге жылдырып колдонууга болот. Модель 293 килограмм салмакта жана 150 килограммга чейинки бир адамга эсептелген.

Аба температурасы +35 градус болгондо электр энергиясын керектөөсү болжол менен 0,51 кВт·саатты түзөт. Иштеп чыгуучулар кабинаны колдонуу көчмө кондиционерлерге салыштырмалуу эки эсе арзан экенин билдиришүүдө.

Аппараттарды курулуш аянтчаларында, заводдордо, кампаларда жана чарбаларда, башкача айтканда кызматкерлер катуу ысыкта иштеген жайларда орнотуу сунушталууда. Ошондой эле кабиналар мектептерде, соода борборлорунда, фестивалдарда жана башка массалык иш-чараларда колдонулушу мүмкүн.

Do Hiemon Box түзмөгүн жапониялык SDRS компаниясы иштеп чыккан, ал эми сатууну Trusco Nakayama компаниясы жүргүзөт. Аппарат 2026-жылдын 1-апрелинен тарта рынокко чыгарылган.

Стандарттык моделдин баасы салыктарды эсептебегенде 1,5 млн иенди түзөт. Кыргыз Республикасынын Улуттук банкынын 2026-жылдын 18-июлундагы расмий курсу боюнча бул болжол менен 807,8 миң сомго барабар.