
Кыргызстандык дарыгерлерди Шумаков атындагы Трансплантология борборунда окутуу мүмкүнчүлүктөрү талкууланды
Кыргызстандын саламаттык сактоо министри Алымкадыр Бейшеналиев Россия Федерациясынын Москва шаарына 17-сентябрда иш сапары менен барды.
Ведомстводон билдиришкендей, анын алкагында Россиянын саламаттык сактоо тармагынын маанилүү ишмерлери менен жолугушуулар болуп, бир катар артыкчылыктуу багыттар боюнча эки тараптуу кызматташуу маселелери талкууланды.
Сапардын негизги окуяларынын бири Россия Федерациясынын саламаттык сактоо министри Михаил Мурашко менен жолугушуу болду.
Сүйлөшүүлөрдүн жүрүшүндө тараптар кызматташуунун дары-дармек менен камсыздоо, акушердик жана гинекология, педиатрия, онкология жана трансплантология сыяктуу маанилүү багыттарын талкуулашты.
Алымкадыр Бейшеналиев Россия Кыргызстан үчүн саламаттыкты сактоо тармагындагы эң маанилүү стратегиялык өнөктөштөрдүн бири экенин белгилеп, биргелешкен аракеттер эки тараптуу кызматташууну мындан ары тереңдетүүгө өбөлгө болоруна ишенимин билдирди.
Жолугушуунун жыйынтыгында тараптар өз ара аракеттенүүнүн темпин жогорулатуу зарылдыгын макулдашты жана өз ара пайдалуу негизде кызматташууну бекемдөө боюнча пландарды белгилешти.
Иш сапардын алкагында ошондой эле Россия Федерациясынын Саламаттык сактоо министрлигинин академик В.И. Шумаков атындагы Трансплантология жана жасалма органдардын улуттук медициналык изилдөө борборунун директору Сергей Владимирович Готье менен жолукту.
Жолугушууда кыргызстандык дарыгерлерди жана медициналык адистерди Шумаков атындагы Трансплантология борборунда окутуу мүмкүнчүлүктөрү талкууланды.
Окутуу Россия Федерациясынын Трансплантология жана жасалма органдардын улуттук медициналык изилдөө борбору менен КР Саламаттыкты сактоо министрлигине караштуу Улуттук хирургия борборунун ортосундагы кызматташуу жөнүндө макулдашуунун алкагында эки жумалык жеке окуу курстары форматында өтөт.
Сергей Владимирович Готье Кыргызстандан келген кесиптештер үчүн эки жумалык жеке программа даярдала турганын баса белгиледи.
«Россиянын трансплантология тармагындагы флагман институту катары биз республикада трансплантология программасын өнүктүрүүгө кызыккан кыргызстандык адистерге керектүү методикалык колдоо көрсөтөбүз. Биз жемиштүү жана узак мөөнөттүү кызматташууга умтулабыз, анткени Кыргызстандын саламаттыкты сактоо тармагында тармакты өнүктүрүү үчүн чоң потенциалы бар», — деди Сергей Владимирович.
Кыргыз тарап Россия Федерациясына активдүү колдоо жана методикалык жардам көрсөтүүгө даярдыгы үчүн терең ыраазычылык билдирди.
Кыргызстанда трансплантологиянын өнүгүшүнө байланыштуу адистерди даярдоо өлкөдөгү медицинанын бул тармагын өркүндөтүү үчүн маанилүү кадам болот.