Энергетика министрлиги 2027-жылы «Газпром Кыргызстандын» газ жоготууларынын ченемин 8,1%га чейин төмөндөтүүнү сунуштады

Кыргызстандын Энергетика министрлиги 2027-жылга карата «Газпром Кыргызстан» ЖЧКсынын жаратылыш газын жоготуу ченемдерин бекитүү тууралуу буйруктун долбоорун коомдук талкууга чыгарды.

Министрликтин негиздеме маалыматына ылайык, газ жоготууларынын ченемин пландалган газ көлөмүнүн 8,1% деңгээлинде белгилөө сунушталууда. Эсептөөдө 647 млн 626 миң 990 көлөмүндөгү газдын келип түшүүсү пландалып, анын 52 млн 456 миң 22си жоготуулар катары каралган.

Министрликтин маалыматы боюнча, бул ченем газды ташуу, бөлүштүрүү жана сатуу процессиндеги технологиялык өзгөчөлүктөргө, ошондой эле газдын физикалык-химиялык касиеттерине байланыштуу сөзсүз пайда болгон жана кайтарылгыс жоготууларды эске алат.

Салыштыруу үчүн, 2026-жылы газ жоготууларынын ченеми 8,3%ды, 2025-жылы 8,7%ды, 2024-жылы 8,8%ды, ал эми 2023-жылы 8,9%ды түзгөн.

Узак мөөнөттүү көрсөткүчтөргө көз чаптырсак, 2010-жылы газ жоготууларынын ченеми 16,3%, 2015-жылы 11,1%, 2020-жылы 9,1% болгон.

Энергетика министрлиги жоготууларды мындан ары кыскартуу, газ менен үзгүлтүксүз жана авариясыз камсыздоону камсыз кылуу максатында жыл сайын капиталдык салымдар планына ишенимдүүлүгү төмөн газ түтүктөрүн жана газ-техникалык жабдууларды алмаштыруу иштерин киргизип келет.

Буйруктун долбоору Кыргызстандын Салык кодексине жана газ чарба ишканаларындагы жаратылыш газынын ченемдик жоготууларын эсептөө методикасына ылайык иштелип чыккан.