Чолпон-Атада ат майданында капиталдык оңдоо иштери жүрүүдө

Курулуш, архитектура жана турак жай-коммуналдык чарба министри Нурдан Орунтаев 13-июнда Ысык-Көл облусуна болгон жумушчу сапарынын алкагында Чолпон-Ата шаарындагы ат майданда жүргүзүлүп жаткан капиталдык оңдоо иштеринин жүрүшү менен таанышты.

Ведомстводон кабарлашкандай, 2026-жылы башталган долбоордун алкагында объекттин негизги бөлүктөрү жаңыланууда. Тактап айтканда, VIP-зона, конок бөлмөлөрү, трибуналар, административдик жайлар, жер төлө бөлүгү жана унаа токтотуучу жайлар капиталдык оңдоодон өткөрүлүүдө. Ошондой эле кире бериш аймагындагы кафель жабуулары алмаштырылып, инженердик тармактар толугу менен жаңыртылууда.

Учурда курулуш-монтаждоо иштери бекитилген графикке ылайык жүргүзүлүүдө. Министр объекттеги иштердин сапатына жана курулуш темпине өзгөчө көңүл буруп, бардык иштерди белгиленген мөөнөттө бүткөрүү боюнча тиешелүү тапшырмаларды берди.

Объект республикалык бюджеттин эсебинен каржыланып, иштердин жүрүшү Курулуш министрлиги тарабынан көзөмөлдөнүүдө.

Маалымат үчүн: Чолпон-Ата ат майданынын тарыхы 1930-жылдардан башталат. Объект 2014-жылы I Дүйнөлүк көчмөндөр оюндарына карата оңдолуп, 2018-жылы толук жаңыланган. Бүгүнкү күндө ал 10 миң көрүүчүгө ылайыкталган заманбап ат спорттук комплекс болуп саналат.