Аида Исатбек кызы: Кыргызстандын парламентиндеги аялдардын өкүлчүлүгү 33,4%га жетти
Кыргызстан аялдардын мамлекеттик чечимдерди кабыл алуу процесстерине катышуусун кеңейтүүнү улантууда. Бул тууралуу Бишкекте өткөн ШКУнун Аялдар форумунда эмгек, социалдык камсыздоо жана миграция министринин орун басары Аида Исатбек кызы билдирди.
Анын айтымында, аялдардын лидерлигин өнүктүрүү аймак өлкөлөрүнүн туруктуу өнүгүүсүнүн маанилүү бөлүгү болуп саналат.
«Аялдар өнүгүү процесстеринин жөн гана катышуучулары эмес — алар анын негизги кыймылдаткыч күчү болуп саналат», — деп белгиледи ал.
Министрдин орун басары Кыргызстан 2019-жылы да ШКУнун Аялдар форумун өткөргөнүн эске салып, ал гендердик теңчилик жаатындагы демилгелерди илгерилетүү, тажрыйба алмашуу жана кызматташтыкты чыңдоо үчүн маанилүү аянтча болгонун айтты.
Ал өлкөдө аялдарды колдоо механизмдери өркүндөтүлүп жатканын, квоталар жана алардын саясий жана коомдук турмушка катышуусун жогорулатууга багытталган чаралар ишке ашырылып жатканын баса белгиледи.
Жүргүзүлгөн иштердин натыйжасында шайланган өкүлдөрдүн ичиндеги аялдардын үлүшү Жогорку Кеңеште 33,4 пайызга, ал эми жергиликтүү кеңештерде 40 пайызга жетти.
«Кыргызстандын тажрыйбасы көрсөтүп тургандай, шайлоо квоталары жана аялдардын лидерлигин өнүктүрүүгө багытталган демилгелер сыяктуу максаттуу чаралар чечим кабыл алуу процессинде тең салмактуу өкүлчүлүккө жетүүнү тездетет», — деди Аида Исатбек кызы.