Кеминде унаа каналга түшүп кетип, үч адам каза болду

Чүй облусунун Кемин районунда Audi 100 үлгүсүндөгү унаа Чоң Чүй каналына түшүп кетти.

Кырсыктын кесепетинен үч адам — ата жана анын эки жашы жете элек баласы каза болду. Бул тууралуу Чүй облустук ички иштер башкы башкармалыгы жана Өзгөчө кырдаалдар министрлиги билдирди.

Каргаша 25-июнда Подгорное айылынын жанында болгон.

Алдын ала маалыматтар боюнча, унаа каналга түшүп кеткенден кийин ичиндеги адамдар суунун катуу агымынан улам өз алдынча чыга албай калышкан.

Окуя тууралуу «112» кызматына маалымат түшкөндөн кийин жерине Кемин районундагы №5 өрт-куткаруу бөлүгүнүн куткаруучулары жана милиция кызматкерлери жөнөтүлгөн.

Издөө-куткаруу иштеринин жүрүшүндө унаа жеке менчик крандын жардамы менен суудан чыгарылган. Унаанын ичинен үч адамдын жансыз денеси табылган.

Укук коргоо органдарынын маалыматына ылайык, каза болгондор бир үй-бүлөнүн мүчөлөрү — ата жана анын эки жашы жете элек баласы болгон.

Аталган факты боюнча Кемин райондук ички иштер бөлүмү тарабынан текшерүү иштери башталды. Учурда трагедиянын бардык жагдайлары такталууда.