Кыргызстандык кыздар турмушка көп чыккан Топ-3 өлкө: алдыда Россия
Кыргызстандык кыздардын кытай жарандарына турмушка чыккан учурлары аз. Бул тууралуу депутат Дастан Бекешев соцтармактагы баракчасына жазды.
Ал “Кызмат” мамлекеттик мекемесине сурамжылоо жиберип, алган жообун жарыялады.
Анда 2022-жылдан 2026-жылдын биринчи кварталына чейинки каттоого алынган никелердин статистикасы көрсөтүлгөн.
Депутат белгилегендей, Кыргызстанда:
- 2022-жылы – 45 605 нике;
- 2023-жылы – 43 574 нике;
- 2024-жылы – 44 984 нике;
- 2025-жылы – 42 714 нике;
2026-жылы (алгачкы 3 айында) - 18 869 нике каттоодон өткөн.
Ошондой эле, аталган жылдарда кыргызстандыктарды жубайлыкка көп алган Топ-3 өлкө булар:
- Россия – 1 493 нике;
- Түркия – 610 нике;
- Өзбекстан – 425 нике.
Бекешев кытай жарандары менен болгон никени бөлүп көрсөтүп, аны менен кимдир бирөөнүн кыжырына тийейин деген оюу жоктугун баса белгилеген.
Айтымында, акыркы 4 жылда 85 кыргызстандык кыз кытайлык жарандарга турмушка чыгышкан.
“Кыргыздын кыздары” кытай жарандарына көп турмушка чыгып жатат деген талкуу көп. Бирок расмий маалыматтар мындай нике анчалык деле көп эместигин көрсөтөт”, – деген депутат.