Буюмдардын экинчи жашоосу: “Эл-Ди-Эс Черитиз” фонду “Чогуу жардам беребиз” долбоорун кантип колдоодо

Кээде жардам жөнөкөй нерседен башталат – бир үй-бүлөгө кереги тийбей калган куртка, бут кийим, оюнчук же китепкап башка бир үй-бүлө үчүн абдан зарыл болушу мүмкүн.

“Эл-Ди-Эс Черитиз” Коомдук кайрымдуулук фонду колдоп жаткан “Чогуу жардам беребиз” долбоору так ушул принцип менен иштейт.

Кайрымдуулук бокстарынан үй-бүлөгө чейин

Долбоор буюмдарды чогултуу үчүн кайрымдуулук бокстарын соода борборлоруна, дүкөндөргө, гипермаркеттерге жана май куюучу жайларга орноштурат.

Бирок буюмдарды бокстарга салуу – бул чоң иштин башталышы гана.

Бардык чогулган кийим, бут кийим, оюнчук жана мектеп куралдары даярдоонун бир нече этабынан өткөрүлөт. Долбоордук топ буюмдарды иргейт, кандай акыбалда экенин текшерет, жууп-тазалайт, жакшынакай көрүнүш берет. Андан кийин гана даяр буюмдарды колдоого муктаж адамдарга таратат.

Бул ыкма кайрымдуулук жардамдарын жөн гана чогултуп коюу эмес, ошондой эле буюмдарды кабыл алуудан баштап, аларды даярдоого жана андан соң муктаж үй-бүлөлөр менен балдарга өткөрүп берүүгө чейинки комплекстүү процессти жолго коюуга мүмкүндүк берет.

Чоң мейкиндик – жардам берүүгө көп мүмкүнчүлүк

Учурда долбоор өнүгүүнүн жаңы этабына чыгууда. Ал үчүн жаңы, бир топ кенен имарат табылды.

Кир жуучу жайды кеңейтүү жана жаңы өнөр жайлык кир жуугуч машиналарды орнотуу пландалууда. Бул чоң көлөмдөгү буюмдарды иштетүүгө жана аларды жогорку сапатта даярдоого мүмкүндүк берет.

“Эл-Ди-Эс Черитиз” фонду бул өзгөрүүлөрдү “Чогуу жардам беребиз”долбоорунун мүмкүнчүлүктөрүн кеңейтүүгө көмөктөшүү аркылуу колдойт.

Бул жаңы жай жөн гана кайрымдуулук буюмдарын чогултуучу пункт эмес, анын максаты — ар бир тартууланган буюм жаңы ээсине жеткенге чейин тиешелүү даярдоодон өтүп, экинчи жашоого ээ боло турган жайга айлануу.

Жөнөкөй нерседен башталган жардам

Долбоордун иши кайрымдуулук адамдан сөзсүз түрдө чоң чыгашаны талап кылбай турганын далилдейт. Кимдир бирөө үчүн эски куртка же китепкап өз кызматын өтөп бүттү, бирок ошол эле убакта алар башка үй-бүлөнүн реалдуу керектөөсүн жаба алат. 

Мындай кайрымдуулук жардамына буюмдарды чогултуу, иргөө, жууп-тазалоо, иштетүү жана аларды жеткирүүнү уюштуруу сыяктуу системалуу иштер кошулганда, көптөгөн адамдардын кичинекей салымы башка үй-бүлөлөр жана балдар үчүн олуттуу колдоого айланат.

“Эл-Ди-Эс Черитиз” фонду үчүн “Чогуу жардам беребиз”долбоорун колдоо — бул системанын натыйжалуураак иштешине жана көбүрөөк адамдарды камтуусуна көмөктөшүү мүмкүнчүлүгү.

Долбоор кеңейүүдө жана өнүгүүдө. Аны менен катар, керексиз буюмдарга жаңы өмүр тартуулоо жана оор кырдаалга кабылган адамдарга жардам көрсөтүү мүмкүнчүлүгү да артып баратат.

Ар кандай жардам ошол нерсеге муктаж болуп турган адамга жеткенде гана чындап маанилүү болот.