Кыргызстанда иштегендердин ар бир алтынчысы соода тармагында эмгектенет

Кыргызстанда иштегендердин дээрлик ар бир алтынчысы соода тармагында эмгектенет.

Улуттук статистика комитетинин «Кыргызстан 2026-жылы сандарда» статистикалык жыйнагындагы маалыматка ылайык, 2025-жылы дүң жана чекене соодада, ошондой эле автоунааларды жана мотоциклдерди оңдоо тармагында 439,2 миң адам иштеген.

Бул тармакта өлкөнүн экономикасында иштегендердин жалпы санынын 15,7%ы эмгектенет.

Айыл, токой чарбасы жана балык уулоо тармагында да дээрлик ушунча адам – 436,4 миң киши иштейт. Бул жалпы иштегендердин 15,6%ын түзөт.

Курулуш тармагында 376,7 миң адам же 13,5%, кайра иштетүү өнөр жайында 311,9 миң адам же 11,1% эмгектенет.

Ал эми билим берүү тармагында дагы 300,1 миң адам иштейт. Бул өлкөдө иштегендердин жалпы санынын 10,7%ына барабар.

Жалпысынан 2025-жылы Кыргызстандын экономикасында 2 млн 799,7 миң адам эмгектенген.