Кыргызстан менен Өзбекстан аскердик чалгындоо маалыматтарын алмашат

Кыргызстандын министрлер кабинети Кыргызстандын жана Өзбекстандын коргоо министрликтеринин ортосунда аскердик чалгындоо жаатында кызматташуу жөнүндө макулдашууну бекитти.

Тиешелүү №641 токтом 2026-жылдын 25-сентябрында кабыл алынган. Макулдашууга 30-июлда Чолпон-Ата шаарында кол коюлган.

Документте эки өлкөнүн аскердик чалгындоо органдарынын ортосунда узак мөөнөттүү кызматташтыкты өнүктүрүү каралган. Анын алкагында расмий жана жумушчу жолугушууларды өткөрүү, биргелешкен машыгууларды жана окууларды уюштуруу, ошондой эле чалгындоо маалыматтары жана эксперттик баалоолор менен алмашуу пландалууда.

Атап айтканда, тараптар улуттук коопсуздукка коркунучтар, террордук жана экстремисттик топтор, алардын курамы, жетекчилиги, тарапташтары, демөөрчүлөрү, курал-жарактары, жайгашкан жерлери жана даярдоо лагерлери тууралуу маалымат алмашат.

Мындан тышкары, Борбордук Азиядагы кырдаалдын кескин өзгөрүшү, террордук жана башка коркунучтардын күчөшү, ошондой эле куралдуу же башка кыйратуучу аракеттерди даярдоо мүмкүнчүлүгү тууралуу маалымат берүү каралган.

Чалгындоо маалыматтары жазуу жүзүндө берилет. Эгер маалыматтар видео, сүрөт, карта же электрондук алып жүрүүчүлөрдөгү башка материалдар түрүндө жөнөтүлсө, алар түшүндүрмө документтер менен коштолот.

Тараптар бири-биринин маалымат алуу боюнча суроо-талаптарына мүмкүн болушунча кыска мөөнөттө жооп берүүгө макулдашкан. Ошол эле учурда суроо-талап экинчи тараптын улуттук эгемендигине же коопсуздугуна коркунуч жаратса, анын мыйзамдарына, улуттук кызыкчылыктарына же эл аралык милдеттенмелерине каршы келсе, четке кагылышы мүмкүн.

Макулдашуунун өзүнчө бөлүмү жашыруун маалыматтарды коргоого арналган. Алынган маалыматтар аны берген тарапка зыян келтирүү максатында пайдаланылбашы керек. Ошондой эле маалыматтарды үчүнчү өлкөлөргө берүү маалыматтын булагы болгон тараптын жазуу жүзүндөгү макулдугу менен гана жүргүзүлөт.

Документте Кыргызстан менен Өзбекстандын эксперттеринин жыл сайын сүйлөшүүлөрдү өткөрүүсү да каралган. Жолугушуулар эки өлкөнүн аймагында кезектешип өткөрүлөт.

Макулдашуу беш жылдык мөөнөткө түзүлөт. Андан кийин тараптардын бири анын колдонулушун токтотуу ниети тууралуу алдын ала билдирбесе, документтин мөөнөтү автоматтык түрдө дагы бир жылга узартылып турат.

Макулдашуунун күчүнө кириши үчүн Кыргызстандын Тышкы иштер министрлиги зарыл болгон ички мамлекеттик жол-жоболордун аяктагандыгы тууралуу Өзбекстандын тарапка билдирүүгө тийиш.