Кыргызстан Airbus компаниясынан 10 учак сатып алышы мүмкүн, Boeing менен да сүйлөшүүлөр жүрүүдө

Кыргызстан Airbus компаниясынан 10 учак сатып алуу боюнча сүйлөшүүлөрдү жүргүзүүдө. Ошондой эле Boeing компаниясынын учактарын сатып алуу маселеси талкууланууда. Бул тууралуу Жарандык авиация мамлекеттик агенттигинин директору Данияр Бостонов «Биринчи радионун» эфиринде билдирди.

Анын айтымында, Airbus компаниясынын жетекчилиги Кыргызстанга келген учурда да сүйлөшүүлөр жүргүзүлгөн.

«Airbus компаниясынан 10 учак сатып алуу боюнча сүйлөшүүлөр жүрүп жатат», — деди агенттиктин жетекчиси.

Мындан тышкары, Кыргызстандын өкүлдөрү жакында Boeing компаниясы менен алдын ала жолугушуу өткөрүп, кызматташуунун мүмкүн болгон багыттарын жана учактарды сатып алуу маселесин талкуулашкан.

Ошол эле учурда Бостонов учактарды сатып алуу боюнча азырынча акыркы келишимдер түзүлө электигин жана жеткирүүнүн так мөөнөттөрү аныктала электигин белгиледи.

Анын айтымында, орто жана узак мөөнөттүү келечекте Кыргызстан аба кемелеринин паркын Airbus жана Boeing компанияларынын учактары менен толуктоону көздөйт.

Бостонов авиакомпаниянын толук кандуу иштеши үчүн эки учак жетишсиз деп эсептейт.