Кыргызстанда майыптыгы бар балдарга берилүүчү ай сайынкы жөлөкпулдун өлчөмү көбөйөт
Кыргызстанда майыптыгы бар балдарга берилүүчү ай сайынкы жөлөкпулдун өлчөмү 2027-жылдын 1-январынан тартып 8 миң сомдон 11 миң сомго чейин көбөйөт. Бул тууралуу Министрлер кабинетинин төрагасы – президенттин администрациясынын жетекчиси Адылбек Касымалиев Жогорку Кеңештин пленардык жыйынында билдирди.
Анын айтымында, жөлөкпулдун өлчөмүн жогорулатуу мамлекеттин социалдык саясатынын алкагында президенттин жарлыгы менен каралган. Ошондой эле 2027-жылдан тартып тоолуу жана алыскы аймактарда жашаган көп балалуу энелерге «Бала Береке» бир жолку жөлөкпулу төлөнө баштайт.
Мындан тышкары, 2027-жылдын 1-январынан тартып башка социалдык төлөмдөрдүн да өлчөмү көбөйөт. Тактап айтканда, ата-энесинен ажыраган балдарга берилүүчү жөлөкпул 6 миң сомдон 8 миң сомго, багуучусунан ажыраган балдарга 3 миң сомдон 5 миң сомго чейин жогорулайт.
«Баатыр эне» наамын алган энелерге берилүүчү ай сайынкы төлөм 3 миң сомдон 5 миң сомго, ал эми пенсиясына кошумча төлөнүүчү каражат 1 миң сомдон 5 миң сомго чейин көбөйөт.
2027-жылдын бюджетинде калкты социалдык жактан коргоого 47,3 млрд сом каралган.
