Кыргызстанда туризм $1 млрд чекти ашты

2025-жылдын жыйынтыгы боюнча Кыргыз Республикасынын туристтик тармагы сапаттуу өсүштү көрсөтүп, улуттук экономикадагы ордун системдүү түрдө бекемдеди. Улуттук статистикалык комитеттин маалыматына ылайык, туристтик кызмат көрсөтүүлөрдүн экспортунан түшкөн кирешелер 1 миллиард АКШ долларынан ашып, 1,098 млрд долларга жетти. Бул көрсөткүч 2024-жылга салыштырмалуу 8,1%га жогору.

Бул чекке жетүү жөн гана сандык көрсөткүч болбостон, тармактын туруктуу трансформациясынын жыйынтыгы болуп саналат. Башкача айтканда, туризм фрагменттик өнүгүүдөн системдүү башкаруу жана илгерилетүү моделине ырааттуу түрдө өтүп жатат.

Бүгүнкү күндө туризм экономикадагы негизги тармактардын бири болуп саналат. Ал жумуш орундарын түзүүгө, региондордун өнүгүшүнө түрткү берип, байланышкан тармактар үчүн мультипликативдик эффектти камсыз кылууда. Жыл жыйынтыгы боюнча туризмдин ички дүң продукттагы үлүшү 3,8%ды түзүп, жалпы кошумча нарк 74,4 млрд сомго жетти.

Өсүш төмөнкү факторлордун комплекси менен камсыздалды:

· Кыргыз Республикасын эл аралык деңгээлде активдүү илгерилетүү;

· туристтик инфраструктураны өнүктүрүү жана тейлөө сапатын жогорулатуу;

· туристтик агымдардын географиясын кеңейтүү;

· ички туризмдин жана региондордогу ишкердик активдүүлүктүн өсүшү.

Учурда туристтик тармакта болжол менен 129 миң чарба жүргүзүүчү субъекттер иш алып барууда. Бул бизнес чөйрөсүнүн жогорку деңгээлде тартылганын жана тармактын өлкөнүн социалдык-экономикалык өнүгүүсүндөгү маанилүүлүгүн тастыктайт.

Өзгөчө мааниге ээ болгон жагдай — жетишилген жыйынтыктар туризмди туруктуу өнүктүрүү моделине багыт алуу шартында калыптанууда. Мында экологиялуулук, маданий мурастарды сактоо жана региондордун тең салмактуу өнүгүүсү артыкчылыктуу багыттар болуп саналат.

Кыргыз Республикасы Борбордук Азиядагы атаандаштыкка жөндөмдүү туристтик багыт катары өз позициясын бекемдөө боюнча стратегиялык курсун ырааттуу ишке ашырууда. Негизги артыкчылыктуу милдеттердин катарына жыл бою иштеген туризмди өнүктүрүү, тармакты санариптештирүү, жаңы туристтик продукттарды түзүү жана эл аралык кызматташууну күчөтүү кирет.

1 миллиард долларлык чекке жетүү — бул мамлекеттик саясаттын натыйжалуулугун ырастаган маанилүү баскыч жана өлкөнүн туристтик потенциалын мындан ары кеңейтүү үчүн жаңы мүмкүнчүлүктөрдү ачат.

Кыргызстандын туризми системдүү өсүү менен эл аралык интеграция жана туруктуу өнүгүү этабына өтүүдө.