Чоң-Алайда 400 тонналык картошканын үрөнүн сактоочу логистикалык борбор ачылат

Ош облусунун Чоң-Алай районундагы Дароот-Коргон айылында 400 тонналык үрөн картошканы сактоого ылайыкташкан заманбап логистикалык борбордун ачылышы  өтөт.

Айыл чарба министрлигинен кабарлашкандай, бул логистикалык борбор эки бөлмөдөн турат, ар бир бөлмөнүн сыйымдуулугу — 200 тонна.

Ошондой эле анын аймагында картошканы сорттоого арналган атайын зона да каралган.

Логистикалык борбордун муздаткыч камераларын куруу үчүн каржылык колдоо төмөнкү булактардан көрсөтүлгөн:

• Ош облусу тарабынан – 5 млн сом,
• Чоң-Алай райондук администрациясынан – 5 млн сом,
• Чоң-Алай айыл өкмөтүнөн – 1 млн сом,
• «Гуд Нейборс» уюму тарабынан — 12 млн сомдон ашык каражат.

Объект Кыргыз Республикасынын мамлекеттик колдоосу менен курулууда. Ал эми «Гуд Нейборс» уюму логистикалык борборду төмөнкү өндүрүштүк жабдуулар менен камсыздайт:

• 2 даана муздаткыч агрегат,
• 1 даана этилен абсорбери,
• 2 даана өндүрүштүк нымдандыргыч,
• 125 кВт кубаттуулуктагы генератор,
• 1 даана электр жүк ташуучу,
• Жыгач контейнерлер.

Мындан сырткары, логистикалык инфраструктураны пайдалануу менен Колумбиядан алып келинген "супер-супер элита" сортундагы үрөн картошка отургузулган. Бул иш-аракеттин негизги максаты — экспортко багытталган картошка өндүрүшүн өнүктүрүү.

Аталган логистикалык борбор айыл чарба продукцияларын сапаттуу сактоо, үрөн картошканын туруктуулугун жана түшүмдүүлүгүн жогорулатуу, ошондой эле фермерлерди колдоо аркылуу айыл чарбасын өнүктүрүүгө маанилүү салым кошот.