Кыргызстанга келген түз чет өлкөлүк инвестициялардын 80%дан ашыгы үч аймакка топтолгон

2025-жылы Кыргызстанга түшкөн түз чет өлкөлүк инвестициялардын 80%дан ашыгы Жалал-Абад жана Чүй облустарына, ошондой эле Бишкек шаарына багытталган. Бул тууралуу Кыргызстандын Улуттук статистика комитетинин маалыматына таянуу менен Ranking.kz басылмасы жазды.

Инвестиция тартуу боюнча Жалал-Абад облусу алдыга чыгып, аймакка 420 млн доллар түз чет өлкөлүк инвестиция келген. Негизги каражаттар кайра иштетүү жана кен казуу өнөр жайларына жумшалган.

Ал эми Бишкек шаарына 401,3 млн доллар инвестиция тартылган. Каражаттар негизинен каржы жана камсыздандыруу ишмердүүлүгүнө, соодага жана кайра иштетүү өнөр жайына багытталган.

Чүй облусуна 228,4 млн доллар инвестиция түшкөн. Каражаттын басымдуу бөлүгү чет элдик капиталы бар кайра иштетүүчү ишканаларды жабдууга жана өнүктүрүүгө жумшалган.

Нарын облусу 84,1 млн доллар, Талас облусу 66,2 млн доллар, Ош облусу 53,3 млн доллар инвестиция тарткан.

Ысык-Көл облусунда 15 млн доллар чет өлкөлүк инвестиция туризмди, мейманкана жана ресторан бизнесин өнүктүрүүгө багытталган.

Ошол эле учурда өлкөдө чет элдик капиталы бар ишканалардын саны өсүүсүн уланткан. 2025-жылы алардын саны 6,1 миңге жетип, бир жыл ичинде 6,6%га көбөйгөн.

Алардын жарымынан көбү, тагыраагы 3,3 миңге жакыны, орус капиталы менен байланышкан ишканалар. Кытай капиталынын катышуусундагы компаниялардын саны 1,2 миңге жетип, бир жылда үчтөн бирине жакын өскөн.

Чет элдик капиталы бар ишканалардын дээрлик жарымы (45,8%) соода тармагында иш алып барат. Ошол эле учурда өнөр жайдагы мындай компаниялардын үлүшү акыркы төрт жылда 18,1%дан 12,7%га чейин кыскарган.