Түштүк Кореяда иттин этин өндүргөн чарбалардын 87%ы жабылды

Түштүк Кореяда 2026-жылдын сентябрына карата иттерди тамак-аш өндүрүшү үчүн багуучу катталган 1 миң 537 чарбанын 1 миң 339у ишин токтотту. Бул жалпы чарбалардын болжол менен 87%ын түзөт. Бул тууралуу «Вся Корея» Telegram-каналы Түштүк Кореянын Айыл чарба, азык-түлүк жана айыл аймактарын өнүктүрүү министрлигине таянып жазды.

Чарбалардын жабылышы баштапкы пландан тез жүрүүдө. Бийлик бул мезгилге чейин 1 миң 30 чарбанын ишин токтотууну көздөгөн. Бирок иш жүзүндөгү көрсөткүч пландагыдан 309 чарбага көп болду.

Иттердин саны да кескин кыскарган. 2024-жылдын августунда катталган чарбаларда 468 миңге жакын ит багылса, учурда алардын саны болжол менен 7 миң 600дү түзөт. Башкача айтканда, катталган иттердин саны 98%дан ашык кыскарган.

2024-жылдын январында Түштүк Кореянын Улуттук ассамблеясы иттин этин өндүрүү тармагын этап-этабы менен токтотуу жөнүндө мыйзам кабыл алган. Иттерди тамак-аш үчүн багууга, көбөйтүүгө, союуга, таратууга жана сатууга толук тыюу 2027-жылдын 7-февралынан тартып күчүнө кирет.

Белгиленген мөөнөттөн мурда ишин токтоткон чарбалардын ээлерине мамлекет тарабынан каржылык колдоо көрсөтүү каралган.

2026-жылдын ноябрь жана декабрь айларында бийлик катталган чарбаларга кошумча текшерүүлөрдү жүргүзүүнү пландоодо. Анын максаты — жабылган чарбалар кайра ишин баштабаганын жана иштеп жаткан чарбалар өткөөл мезгилдин талаптарын аткарып жатканын текшерүү.

Ошондой эле калган иттердин мындан аркы тагдыры боюнча маселе каралууда. Министрлик жаныбарларды жашына, көлөмүнө, тукумуна жана жүрүм-турумуна жараша коргоо жана багуу системасын даярдап жатат.

Ошол эле учурда катталган иттердин санынын азайышы алардын баары куткарылганын же жаңы ээлерине берилгенин билдирбейт. Жарыяланган статистика ар бир иттин мындан аркы тагдырын аныктоого мүмкүндүк бербейт.