Кыргызстандын ЕАЭБ өлкөлөрү менен соода жүгүртүүсүнүн дээрлик үчтөн экиси Россияга туура келди

Кыргызстандын ЕАЭБ өлкөлөрү менен өз ара соода жүгүртүүсүнүн көлөмү 2026-жылдын январь–август айларында 4,3 млрд долларды түздү. Бул тууралуу Кыргызстандын Экономика жана коммерция министрлигинен билдиришти.

Өткөн жылдын ушул мезгилине салыштырмалуу соода жүгүртүү 5,5%га өскөн.

ЕАЭБ алкагында Кыргызстандын негизги соода өнөктөшү Россия бойдон калууда. Анын өз ара соодадагы үлүшү 64,5%ды түздү. Ал эми Казакстандын үлүшү 32,7% болду.

Ошол эле учурда Кыргызстандын ЕАЭБ өлкөлөрүнө экспорту 9,1%га төмөндөсө, импорту 9,3%га өскөн.

ЕАЭБ өлкөлөрү менен соода жүгүртүү Кыргызстандын жалпы тышкы соода жүгүртүүсүнүн 36%ын түздү.

Ал эми биримдикке кирбеген үчүнчү өлкөлөр менен соода жүгүртүү 7,7 млрд долларга жетип, 18,2%га өскөн.