Кыргызстанда 14 млн долларлык жүндү кайра иштетүүчү ири ишкана курулууда

Чүй облусунда жүндү кайра иштетүүчү ири ишкана курулууда. Долбоорго салынган инвестициянын көлөмү болжол менен 14 млн долларды түзөт. Бул тууралуу «Биринчи радионун» эфиринде Кайра иштетүү өнөр жайы жана органикалык айыл чарба департаментинин Чүй облусу боюнча башкармалыгынын башчысы Аман Бакиров билдирди.

Анын айтымында, мамлекет инвесторго агроөнөр жай аймагынын аймагынан 5 гектар жер бөлүп берген.

«Бизде мындай ишканалар дээрлик болгон эмес. Ишкана ишке киргенден кийин жүндү өлкө ичинде кайра иштетүүгө мүмкүнчүлүк түзүлөт. Учурда анын бир топ бөлүгү коромжу болуп же чет өлкөгө чыгарылып кетүүдө», — деди Бакиров.

Ишкананы 2027-жылы ишке киргизүү пландалууда.

Муну менен катар өндүрүштүн иштеши үчүн зарыл болгон тазалоочу курулмалар да курулууда. Бул багыттагы иштерге кытайлык China Road компаниясы катышууда.

Бакировдун айтымында, долбоорду тезирээк ишке киргизүү максатында ишкананын жана тазалоочу курулмалардын курулушу параллелдүү жүргүзүлүүдө.

Иштерди толук аяктоо алдын ала 2027-жылга белгиленген.