Ишкердиктин жаңы стандарты: Кыргызстандагы 30 компания Ак ниеттүү ишкерлер реестринен сертификаттарды алышты

Соода-өнөр жай палатасынын ачык эшиктер күнүнүн алкагында Ак ниеттүү ишкерлер реестринин презентациясы жана жогорку деңгээлдеги ишкердик беделин, ачык-айкындуулукту жана ишенимдүүлүктү көрсөткөн компанияларга сертификат тапшыруу аземи өткөрүлдү.

Иш-чарага Соода-өнөр жай палатасынын президенти Темир Сариев, мамлекеттик органдардын, бизнес коомчулугунун жана ишкерлердин өкүлдөрү катышты.

Иш-чараны ачып жатып, Соода-өнөр жай палатасынын президенти Темир Сариев заманбап бизнес барган сайын ишенимге негизделип жатканын жана ишкердик бедел компаниянын эң маанилүү материалдык эмес активдеринин бирине айланып баратканын белгиледи.

"Ак ниеттүү ишкерлер реестри жөн гана компаниялардын тизмеси эмес. Бул бизнес, өкмөт, инвесторлор жана керектөөчүлөрдүн ортосундагы ишенимди жогорулатуу механизми. Бүгүнкү күндө ишенимдүүлүк жана ачыктык маанилүү атаандаштык артыкчылыгына айланууда", – деп баса белгиледи Сариев.

Ак ниеттүү ишкерлер реестри Соода-өнөр жай палатасы тарабынан жагымдуу бизнес чөйрөсүн түзүү, бизнестин ачык-айкындуулугун жогорулатуу жана мамлекет, өнөктөштөр жана коом алдындагы милдеттенмелерин абийирдүү аткарган компанияларды колдоо максатында түзүлгөн.

Иш-чаранын жүрүшүндө катышуучуларга Реестрди түзүү принциптери, тандоо критерийлери жана ага кирген компаниялар үчүн артыкчылыктар жөнүндө маалымат берилди.

Документтерди карап чыгуудан жана алардын ишин баалоодон кийин, Кыргыз экономикасынын ар кандай тармактарын көрсөткөн 30 компанияга Ак ниеттүү ишкерлер реестринин сертификаттары тапшырылды.