Ысык-Көлдүн акваториясынан 400 метр мыйзамсыз балык уулоочу тор чыгарылды

Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын жана Ысык-Көл регионалдык башкармалыгынын инспекторлору тарабынан мыйзамсыз балык уулоого каршы кезектеги рейд жүргүзүлдү.

Рейддик иш-чаранын жүрүшүндө Ысык-Көлдүн акваториясынан жалпы узундугу 400 метрди түзгөн эски кытайлык балык уулоочу тор чыгарылды.

Аталган мыйзамсыз балык уулоочу каражаттар көлдүн экосистемасына олуттуу зыян келтирип, балык ресурстарынын азайышына алып келиши мүмкүн. Ушуга байланыштуу инспекторлор тарабынан мындай мыйзам бузууларды аныктоо жана алдын алуу боюнча иштер үзгүлтүксүз жүргүзүлүп келет.