Ош шаарындагы Ак-Буура дарыясы таштандылардан тазаланууда

Ош шаарындагы Ак-Буура дарыясында ири тазалоо иштери уланууда. Бул тууралуу Өзгөчө кырдаалдар министрлигинен кабарлашты. 

Бүгүн, 23-мартта өзгөчө кырдаалдар министри Канатбек Чыныбаев Ош шаарына болгон иш сапарынын алкагында аталган дарыянын тазалоо иштеринин жүрүшү менен таанышты.

Тазалоо иштерине Өзгөчө кырдаалдар министрлиги тарабынан зарыл болгон бардык күч-каражаттар жана атайын техникалар толук көлөмдө бөлүнгөн.

Жыйынтыгында Ак-Буура дарыясынын 17 чакырым аралыгы таштандылардан толук тазаланып, тийиштүү тартипке келтирилет.

Министр кызматкерлерге ишти ыкчам, сапаттуу жүргүзүүнү жана өз үйлөрүндөй мамиле жасап, жоопкерчилик менен иштөөнү тапшырды.