Цирк артисттери президентке кайрылышты: 186 кызматкердин 100дөн ашыгы кетип калды

Кыргызстандын мамлекеттик циркинин артисттери жана кызматкерлери өлкө президентине видео кайрылуу жасап, мекеменин ичиндеги кырдаалды айтып, учурдагы жетекчиликтин ишине нааразычылыгын билдиришти.

Коллективдин өкүлдөрүнүн айтымында, цирктин тарыхында мынчалык масштабдагы кризиске буга чейин туш болушкан эмес. Калыптанган кырдаалды кызматкерлер директор Светлана Аширова кабыл алган башкаруучулук чечимдер менен байланыштырышууда.

Кайрылуунун авторлорунун маалыматына караганда, буга чейин циркте 186 кызматкер эмгектенген. Алардын арасында 45 артист жана оркестрдин 11 музыканты болгон. Азыркы жетекчилик иштеген мезгилде, алардын маалыматы боюнча, мекемеден 100дөн ашуун адам кеткен.

Кызматкерлердин айтымында, жумуштан кеткендердин арасында эмгек сиңирген артисттер, эки цирк династиясынын өкүлдөрү, маданияттын мыктылары, сахна ардагерлери, ошондой эле эл аралык цирк фестивалдарынын байге ээлери болгон жаш артисттер да бар.

Коллектив кадрлардын тез-тез алмашуусуна да көңүл бурууда. Алардын айтымында, айрым жаңы кызматкерлер жумушка орношкондон эки-үч ай өткөндөн кийин эле иштен кетип жатышат.

Мындан тышкары, видео кайрылууда айтылгандай, ушул убакыт аралыгында мекемеде директордун үч орун басары алмашкан.

Цирктин артисттери жана кызматкерлери президенттен бул кырдаалга көңүл буруп, мекемеде болуп жаткан окуяларды иликтеп берүүнү өтүнүштү.