Маданият тармагынын бюджети дээрлик 7 млрд сомго жетти
Президент Садыр Жапаров төрагалык кылган республикалык кеңешмеде министрлер кабинетинин төрагасынын орун басары Эдил Байсалов 2025-жылдагы маданият тармагындагы негизги жетишкендиктер тууралуу маалымат берди.
Ал маданият коомдун руханий негизи экенин белгилеп, тармакта масштабдуу реформалар жана инвестициялар ишке ашканын айтты.
Бюджеттик колдоо
2021-жылы маданият тармагынын бюджети 2,8 млрд сом болсо, 2025-жылы 6,9 млрд сомго жетип, дээрлик 2,5 эсеге өстү.
Президенттин Жарлыгынын алкагында 2030-жылга чейинки маданият жана искусствону өнүктүрүү программасы кабыл алынды.
Материалдык-техникалык база
2025-жылы бул багытка 851 млн сом бөлүндү:
• 72 автобус – 359 млн сом;
• 21 комплект музыкалык аспап – 28 млн сом;
• LED-экрандар – 241 млн сом;
• Steinway роялы, жарык-үн жабдыктары – 90 млн сом.
Имараттарды оңдоого кошумча 177 млн сом каралды.
Ири инфраструктуралык долбоорлор
• Б.Бейшеналиева атындагы КУМИУга жаңы корпус – 990 млн сом;
• М.Күрөңкеев атындагы окуу жайга жаңы имарат – 750 млн сом.
Манас шаарында 3 200 орундуу филармония жана жаңы музей курулууда.
Маданий кызматтардын өсүшү
Театрлардын атайын каражаттары 155 млн сомго жетти.
Коюулуштар 1186дан 3528ге чейин (+197%), көрүүчүлөр 369 миңден 1,45 млнго чейин өстү.
Музейлерге келгендер 383 277ден 1 237 395 адамга жетти.
Кинематография
2021-жылы 16 тасма тартылса, 2025-жылы 63кө жетти.
Кино көрсөтүүдөн түшкөн киреше 2,5 млн сомдон 21,9 млн сомго өстү.
Каржылоо 33 млн сомдон 648,3 млн сомго чейин көбөйүп, 19,6 эсеге артты.
2026-жылдын 25-февралында Лондондо «Beyond the Silk Road» даректүү тасмасынын бет ачары өттү. Башкы каарман — BAFTA сыйлыгынын ээси Доминик Уэст.
Улуттук мурас
Алгачкы жолу “Улут деми – Уңгу жол” параддык гобелени даярдалып, Улуттук тарых музейине жайгаштырылды.
Жаштар саясаты
Каржылоо 4 млн сомдон 50 млн сомго чейин өстү.
Иш-чаралар 9дан 468ге чейин көбөйдү.
Маданият министрлиги билдиргендей, бул жетишкендиктер мамлекет башчысынын колдоосу менен ишке ашууда. Алдыда инфраструктураны жаңылоо жана улуттук мурасты даңазалоо иштери улантылат.