Айпери Медет кызы MUHAMET MALO–2026 турниринин финалына чыкты

Албаниянын Тирана шаарында өтүп жаткан спорттук күрөш боюнча MUHAMET MALO–2026 эл аралык рейтингдик турнири уланууда. Бүгүн, 28-февралда кыз-келиндер күрөшү боюнча 76 кг чейин салмак чен бирдигинде Кыргызстандык балбан Айпери Медет кызы катышып жатат.

Айпери мелдештин алгачкы баскычын 1/8 финалдан баштады.

Анда Казакстандын балбан кызы Гулмарал Еркебаеваны 12:2 ири эсебинде жеңип, чейрек финалга жолдомо алды.

Кийинки айлампада болгариялык Ванеса Георгиева менен болгон кармашта 10:0 эсебинде мөөнөтүнөн мурда жеңишке жетип, жарым финалга чыкты.

Финалга чыгуу үчүн болгон беттеште Түркиянын өкүлү Эльмира Ясинди 9:0 эсебинде утуп, финалга жолдомо алды.

Ал эми алтын медаль үчүн чечүүчү финалдык кармашта Эквадор өлкөсүнүн спортсмени Генезис Вальдес менен күч сынашат.