Өзбекстанда шахмат боюнча Олимпиадада алтын медаль алган спортчуларга $200 миң төлөнөт

Өзбекстанда шахматчыларга жана алардын машыктыруучуларына ири эл аралык мелдештерде байгелүү орундар үчүн берилүүчү бир жолку акчалай сыйлыктардын өлчөмү көбөйтүлдү.

Тиешелүү токтомго 21-сентябрда кол коюлган.

Эми шахмат боюнча Дүйнөлүк олимпиадада жана паралимпиадада алтын медаль алган спортчуга 200 миң доллар, күмүш медаль үчүн 100 миң доллар, коло медаль үчүн 50 миң доллар төлөнөт.

Жеңүүчүлөрдүн машыктыруучуларына 50 миң доллардан берилет. Күмүш медаль алган спортчуну даярдаган машыктыруучу 25 миң доллар, коло медаль үчүн 12,5 миң доллар алат.

Буга чейин сыйлыктардын өлчөмү базалык эсептик чоңдукка байланыштуу болгон. Анын азыркы өлчөмү боюнча шахмат боюнча Олимпиадада алтын медаль алган спортчуга болжол менен 75 миң доллар берилчү. Ошентип, жеңүүчүгө берилүүчү сыйлыктын өлчөмү 2,5 эседен ашык көбөйдү.

Ошондой эле жаштар арасындагы шахмат боюнча Дүйнөлүк олимпиада жана паралимпиада үчүн биринчи жолу өзүнчө сыйлыктар белгиленди. Биринчи орунду ээлеген шахматчыга 20 миң доллар, экинчи орун үчүн 10 миң доллар, үчүнчү орун үчүн 5 миң доллар төлөнөт. Машыктыруучуларга тиешелүүлүгүнө жараша 5 миң, 2,5 миң жана 1,25 миң доллар берилет.

Мындан тышкары, Эл аралык шахмат федерациясынын классификациясы боюнча дүйнөлүк жана Азия деңгээлиндеги мелдештерде медаль алган спортчуларга берилүүчү төлөмдөр да кайра каралды.

Ошондой эле эл аралык гроссмейстер наамын алган шахматчыга бир жолку 5 миң доллар өлчөмүндө сыйлык берилет.