Бекешев ЖРТны биринчи жолу тапшырууну акысыз кылууну жана мугалимдерди ишембиликке чыгарууга тыюу салууну сунуштады

Жогорку Кеңештин депутаты Дастан Бекешев мектептик билим берүү жана жалпы республикалык тестирлөөгө (ЖРТ) байланыштуу жаңы мыйзам долбоорун даярдап жатканын билдирди.

Анын айтымында, документ жакын арада Жогорку Кеңештин расмий сайтына жарыяланат.

Мыйзам долбоорунда үч негизги өзгөртүү каралган.

Биринчиси мектеп формасына байланыштуу. Бекешев ар бир мектепке мугалимдер, ата-энелер жана окуучулар менен биргеликте мектеп окуучуларынын кийимине карата талаптарды өз алдынча аныктоо укугун берүүнү сунуштоодо.

Ошол эле учурда депутат сөз мектеп формасын толугу менен жокко чыгаруу жөнүндө болуп жатпаганын белгиледи. Анын пикиринде, талаптар акылга сыярлык болуп, кийим окуучуга ыңгайлуу жана билим алуусуна тоскоолдук кылбашы керек.

Экинчи сунуш — ЖРТны биринчи жолу тапшырууну мамлекеттин эсебинен акысыз кылуу.

«Албетте, Финансы министрлиги каршы чыгат. Бирок мамлекетке билимдүү жарандар керек», — деп жазды депутат.

Муну менен катар Бекешев ЖРТ өткөрүүнү санариптик форматка өткөрүүнү сунуштады.

Үчүнчү демилге мугалимдерге тиешелүү. Депутат педагогдорду кесиптик милдеттерине байланышпаган иштерди аткарууга мажбурлаган учурлар үчүн айып пул киргизүүнү сунуштоодо.

Анын айтымында, мугалимдерди аткаминерлердин же мектеп жетекчилеринин көрсөтмөсү менен сырдоочу, короону тазалоочу, оңдоо иштерин жүргүзүүчү катары иштетүүгө же милдеттүү ишембиликтерге катыштырууга болбойт.

Бекешев ошондой эле 1-сентябрь салттуу түрдө Билим күнү катары белгиленип келерин айтып, бирок бул датаны расмий түрдө Билим күнү катары бекиткен өзүнчө ченемдик укуктук актыны таба албаганын белгиледи.

Азырынча бул депутаттын демилгеси болуп саналат. Мыйзам долбоору алгач жарыяланып, андан кийин Жогорку Кеңеште каралышы керек.