Бишкек ЖЭБдин 65 жылдыгына арналган салтанаттуу иш-чара өттү

Бишкек шаарынын мэриясында Бишкек жылуулук электр борборунун 65 жылдык мааракесине арналган салтанаттуу иш-чара болуп өттү.

Мааракеге Бишкек шаарынын мэринин биринчи орун басары Кубанычбек Иманалиев, мэрдин орун басары – ЖЭК департаментинин директору Насипбек Керимов, Бишкек шаарынын мэриясынын тармактык түзүмдөрүнүн жетекчилери, «Бишкек ЖЭБ» муниципалдык ишканасынын жетекчилиги, ишканалардын жетекчилери, станциянын ардагерлери жана кызматкерлери катышты.

Иш-чаранын жүрүшүндө ЖЭБдин эмгек жамаатына жана ишкананын ардагерлерине куттуктоо сөздөрү айтылды.

Бишкек шаарынын мэринин биринчи орун басары Кубанычбек Иманалиев куттуктады.

Ал Бишкек ЖЭБдин борбор калааны жылуулук жана электр энергиясы менен камсыз кылуудагы маанилүү ролун белгилеп, ишкананын бир нече муундан турган кызматкерлеринин шаардын өнүгүшүнө кошкон салымын баса белгиледи.

«Бүгүн биз ишкананын жөн гана мааракесин белгилеп жаткан жокпуз. Бул – 65 жылдык кесипкөйлүктүн, жоопкерчиликтин жана өз ишине берилгендиктин тарыхы. Бишкек ЖЭБи борбор калаанын энергетикалык инфраструктурасынын маанилүү бөлүгү болуп саналат. Анын туруктуу ишинин артында шаарды ондогон жылдар бою жылуулук жана электр энергиясы менен камсыз кылып келген миңдеген адистердин жана ардагерлердин эмгеги турат», – деп белгиледи мэрдин биринчи орун басары.

Кубанычбек Иманалиев ЖЭБдин эмгек жамаатына жана ардагерлерине кесипкөйлүгү, көп жылдык ак ниет эмгеги жана энергетика тармагын өнүктүрүүгө кошкон салымы үчүн ыраазычылык билдирди.

Иш-чарада станциянын борбор калааны жылуулук жана электр энергиясы менен камсыз кылуудагы маанилүү ролу, ошондой эле энергетиктердин бир нече муунунун ишкананын өнүгүшүнө кошкон салымы белгиленди.

Станциянын жабдууларынын үзгүлтүксүз иштешин жана шаарды ишенимдүү энергия менен  камсыз кылган кызматкерлердин кесипкөйлүгүнө өзгөчө көңүл бурулду.

Мааракенин  алкагында Бишкек ЖЭБдин ардагерлери жана мыкты кызматкерлери сыйланды. Көп жылдык ак ниет эмгеги, кесипкөйлүгү жана энергетика тармагын өнүктүрүүгө кошкон салымы үчүн кызматкерлерге ыраазычылык каттары, Ардак грамоталар, төш белгилер, ошондой эле кол сааттары тапшырылды.

Бишкек ЖЭБдин 65 жылдык тарыхы – энергетиктердин бир нече муунунун эмгегинин, борбор калаанын өнүгүшүнүн жана ишкананын үзгүлтүксүз өсүшүнүн тарыхы.

Бүгүнкү күндө станцияда техникалык жаңылоо иштери жана анын ишинин ишенимдүүлүгүн жана натыйжалуулугун жогорулатууга багытталган иш-чаралар улантылууда.