Numbeo дүйнө шаарларынын коопсуздук индексин жаңылады: Кыргызстандын шаарлары рейтингге кирген жок
Аналитикалык Numbeo агенттиги дүйнө шаарларынын Safety Index (Коопсуздук индекси) боюнча жаңыланган рейтингин жарыялады. Тизмеге дүйнөнүн 401 шаары кирген. Бирок анда Кыргызстандын бир дагы шаары камтылган эмес.
Коопсуздук индекси шаардагы жалпы коопсуздук деңгээлин чагылдырып, кылмыштуулуктун деңгээли, терроризм коркунучу, коррупциянын жайылышы жана коомдогу туруктуулук сыяктуу көрсөткүчтөрдүн негизинде түзүлөт.
Рейтингдин сап башына Бириккен Араб Эмираттарынын шаарлары чыкты. Биринчи орунду 88,8 упай менен Аджман ээледи. Андан кийинки орундарда Абу-Даби (88,6), Рас-эль-Хайма (85,4) жана Шарджа (84,7) жайгашты. Алдыңкы бештикти Катардын борбору Доха 84,6 упай менен жыйынтыктады.
Ошондой эле Дубай, Тайбэй, Маскат жана Гаага шаарлары да коопсуздук деңгээли боюнча жогорку көрсөткүчтөргө ээ болду.
Борбор Азия өлкөлөрүнөн рейтингге Ташкент, Алматы жана Астана шаарлары кирген. Алардын ичинен эң жогорку көрсөткүч Ташкентте катталып, коопсуздук индекси 74,2ни түздү. Астананын көрсөткүчү – 66,7, ал эми Алматыныкы – 47,1 болду.
Россиянын шаарларынын ичинен эң жогорку көрсөткүч Төмөнкү Новгороддо катталып, анын коопсуздук индекси 72,0 болуп, дүйнөлүк рейтингде 59-орунга жайгашты. Москванын көрсөткүчү – 65,0, Санкт-Петербургдуку – 62,5, Екатеринбургдуку – 56,6, ал эми Новосибирскиники – 54,9 болду.
Салыштыруу үчүн айтсак, Минсктин коопсуздук индекси 50,9 болсо, Лондондун көрсөткүчү 44,7ни түзгөн.
Ал эми дүйнөдөгү эң кооптуу шаарлар катары Түштүк Африка Республикасындагы Претория, Венесуэланын Каракас шаары, Түштүк Африкадагы Питермарицбург, Папуа–Жаңы Гвинеядагы Порт-Морсби жана Түштүк Африкадагы Йоханнесбург аталган.
Эксперттердин белгилешинче, коопсуздук индекси көбүнчө жашоо сапаты, калктын киреше деңгээли, укук коргоо органдарынын ишинин натыйжалуулугу жана коомдогу социалдык туруктуулук менен тыгыз байланыштуу. Ошол эле учурда бир өлкөнүн ичинде да шаарлардын коопсуздук көрсөткүчтөрү бири-биринен олуттуу айырмаланышы мүмкүн.