Бишкек мэриясы тыгынга каршы күрөшүү үчүн транспортко чектөө киргизүү идеясынан баш тартты

Бишкек мэриясы жол тыгындарын азайтуу максатында транспортко чектөө киргизүү мүмкүнчүлүгүн карап чыгып, бирок бул варианттан баш тартты. Бул тууралуу бүгүн, 14-октябрда Жогорку Кеңештин жыйынында борбор калаанын мэри Айбек Жунушалиев билдирди.

Тыгын көйгөйүн чечүү боюнча чаралар тууралуу депутат Улукбек Карыбек уулу суроо берди.

Ал 2026-жылы Бишкектин 173 көчөсүндө жол оңдоо иштери башталганын белгилеп, шаар бийлиги транспорттук жүктөмдү азайтуу үчүн кандай ыкманы тандаганына кызыкты.

Айбек Жунушалиевдин айтымында, тыгын көйгөйү комплекстүү түрдө чечилип, негизги басым жол инфраструктурасын жаңылоого жасалууда.

Мэр Бишкекте 154 чакырым жол оңдолгонун билдирди. Салыштыруу үчүн ал 2021-жылга чейин бир жылда эң көп дегенде 17,2 чакырымга жакын жол оңдолуп келгенин айтты.

Мындан тышкары, шаарда жол кыймылын жөнгө салуучу автоматташтырылган система киргизилип, жөө жүргүнчүлөр жана велосипедчилер үчүн инфраструктура өнүктүрүлүүдө.

Ошол эле учурда депутат муниципалитеттин маалыматына таянып, быйыл 80 чакырымдан ашык жол оңдолгонун белгилеген. Ал эми мэр өз жообунда 154 чакырым деген көрсөткүчтү атады.