Таланттуу актёр Руслан Курманалиев мезгилсиз дүйнөдөн кайтты

Кыргыз маданият чөйрөсү дагы бир таланттуу инсандан ажырады. Кыргыз мамлекеттик Б. Кыдыкеева атындагы жаш көрүүчүлөр театрынын жетектөөчү артисти, белгилүү актёр жана сахна чебери Руслан Сейитбекович Курманалиев 53 жашында мезгилсиз дүйнөдөн кайтты. 

Руслан Курманалиев 1972-жылы Нарын облусунун Сары-Ой айылында жарык дүйнөгө келген.

Жаш кезинен эле өнөргө жакын болуп, мектептик конкурстарда өзүнүн таланты менен айырмаланып, көпчүлүктүн назарына түшкөн. 1987-жылы М. Күрөнкеев атындагы окуу жайга тапшырып, чыгармачылык жолун баштаган.

Өмүрүн өнөргө арнаган Курманалиев 30 жылдан ашык убакытта театр жана кино тармагында эл сүймөнчүгүнө ээ болгон көптөгөн ролдорду жаратты. Анын сахнада жана экранда аткарган 80ден ашык образдары кыргыз маданиятынын бай мурастарынын катарына кирип, көрүүчүлөрдүн жүрөгүн багындырды.

Ал чыгармачылык жолун «Жайсаң» театрынан баштап, кийин «Тунгуч» жаштар театрында иштеп, 2000-жылдан тарта Кыргыз мамлекеттик жаш көрүүчүлөр театрына өтүп, өзүнүн чыныгы талантын ачты. 2021–2024-жылдары аталган театрдын көркөм жетекчиси катары эмгектенип, театр жамаатын жаңы бийиктиктерге жетеледи. Анын жетекчилигинин алдында театр эл аралык аренада да ийгиликтерге жетишти.

Курманалиевдин чыгармачылык жолу Чыңгыз Айтматовдун чыгармаларынан баштап, дүйнөлүк классикага чейин кеңири камтып, унутулгус образдарды тартуулады. Ошондой эле кино тармагында да ондогон фильмдерге катышып, көрүүчүлөргө таанымал болду.

Элге жакын мүнөзү, адилеттүүлүгү жана чыныгы чыгармачыл берилгендиги аркылуу ал кесиптештеринин урмат-сыйына татыды. Өзүнүн чыгармачылык эмгектери үчүн мамлекеттик жана эл аралык сыйлыктарга ээ болуп, искусствого чоң салым кошту. Театр менен кино үчүн анын эмгеги тарыхта калаары шексиз.