Чолок айылында болгон окуя. Жубайы жолдошуна карата эч кандай доо арызы жок экендигин билдирди

Чүй облусунун ички иштер башкы башкармалыгы Кемин районунда болгон окуя боюнча төмөнкүлөрдү маалымдайт:

2025-жылдын 15-декабрында интернет булактарында блогер Эртай Исаков тарабынан Instagram социалдык тармагындагы жеке баракчасы аркылуу жарыяланган видео тасма тараган. Анда 2025-жылдын 15-декабрында саат 21:25 чамасында Кемин районунун Чолок айылында жаран мас абалында күмүш түстөгү «Mercedes S-Class» үлгүсүндөгү автоунааны башкарып, жубайы менен сөз талашып жаткандыгы чагылдырылган.

Аталган факт каттоого алынып, окуя болгон жерге тергөө-ыкчам тобу чыгып, териштирүү иштеринин жүрүшүндө окуяга катышкан жарандар Кемин шаарынын тургундары – 1992-жылы туулган С.А. жана анын жубайы 1998-жылы туулган С.С. экендиги аныкталган. Алар жагдайларды тактоо үчүн Кемин райондук ички иштер бөлүмүнө жеткирилген.

Айдоочуга карата медициналык күбөлөндүрүү жүргүзүлүп, анын мас абалында болгондугу тастыкталган. «Mercedes S-Class» үлгүсүндөгү автоунаа айып короого токтотулуп, тиешелүү материалдар түзүлүп, айдоочулук күбөлүгү жана унаанын каттоо документтери алынып, ишти сотко өткөрүү үчүн Кемин РИИБдин ЖКККсына жиберилген.

Текшерүүнүн жүрүшүндө жаңжал үй-бүлөлүк-тиричилик негизде чыккандыгы, физикалык күч колдонуу фактылары катталбагандыгы аныкталган. Жубайы жолдошуна карата эч кандай доо арызы жок экендигин билдирип, арыз жазуудан баш тарткан.

Жыйналган материалдардын негизинде Кыргыз Республикасынын КЖКнин 27-беренесинин 1-бөлүгүнүн 4-пунктуна ылайык кылмыш ишин козгоодон баш тартуу чечими кабыл алынып, материалдар Кемин РИИБдин КККна жиберилди.