11-февралдан кийин УКМКнын канча кызматкери кызматтан алынды?

Улуттук коопсуздук мамлекеттик комитетинин (УКМК) төрагасы Жумгалбек Шабданбеков 18-мартта АКИpress агенттигине берген маегинде мекемеде жүргүзүлүп жаткан реформалар, бизнес менен өз ара аракеттенүү ыкмалары, коррупцияга каршы күрөш жана кадрлар арасындагы «тазалоо» тууралуу айтып берди.

Анын айтымында, 11-февралдан тартып УКМКнын ички коопсуздук кызматы тарабынан төмөнкү чаралар көрүлгөн:

7 кызматкер жумуштан бошотулган;
83 кызматкер кызмат ордунан алынып, резервге чыгарылган;
кызматка талапкер болгон 6 адам тизмеден чыгарылган;
13 кызматкерге ар кандай тартиптик жаза колдонулган.

Шабданбеков белгилегендей, кызматкерлердин басымдуу бөлүгү — болжол менен 99% — өз милдеттерин ак ниет жана кесипкөйлүк менен аткарышат.

«Мекемени тазалоо процесси жалпы түзүмдү каралоо үчүн эмес, айрым мыйзам бузууларды жоюуга багытталган», — деди ал.

Анын айтымында, таза эмес кызматкерлерди аныктоо жана жоопкерчиликке тартуу иши уланууда, бардык чечимдер текшерилген фактылардын негизинде жана мыйзам чегинде кабыл алынат.