Үйлөрдү сел суулары каптады. Манас шаарына өзгөчө кырдаал режими киргизилди

Манас шаарына өзгөчө кырдаал режими киргизилди, деп билдирет президенттин Жалал-Абад облусундагы өкүлчүлүгү.

Маалыматка ылайык, 24-майда болжол менен саат 23:40 чамасында жааган нөшөрлүү жаандын кесепетинен Манас шаарындагы турак үйлөрдүн жана чарбалык курулмалардын короолорун сел суулары каптаган.

Алдын ала маалымат боюнча, 27 турак үйдүн короосун суу каптап, 4 үйдүн ичине жана 1 үйдүн жер төлөөсүнө суу кирген. Ошондой эле 7 көп кабаттуу турак үйдүн короолоруна жана жер төлөлөрүнө сел суулары кирген.

Селдин кесепеттерин жоюу иштерине КР ӨКМден 84 куткаруучу, 4 мотопомпа, 1 өрт өчүрүүчү унаа, Манас шаардык ЖК кызматтарынан 86 кызматкер жана 9 техника тартылган. Мындан тышкары, 47 жергиликтүү тургун жардам көрсөтүүдө.

Жалпы 217 адам тартылып, учурда селдин кесепеттерин жоюу иштери улантылууда.

Жеринде таңкы саат 04:00 штаб уюштурулуп, Манас шаарына өзгөчө кырдаал режими киргизилди.

Кошумча маалымат берилет.