«Бала ырысы». Арыздар 1-июлдан тарта кабыл алынат

Кыргызстандын Эмгек, социалдык камсыздоо жана миграция министрлиги 2026-жылдын 1-июлунан тартып «Бала ырысы» аттуу жаңы ай сайынкы мамлекеттик жөлөк пулга арыздарды кабыл ала баштайт.

Эмгек министринин орун басары Мирланбек Байгончоковдун маалыматына ылайык, бул төлөм төрөлгөндөн тартып үч жашка чейинки балдарга берилет. Жөлөк пулдун өлчөмү ар бир балага айына 1200 сомду түзөт.

Анын айтымында, жөлөк пул үй-бүлөнүн кирешесине карабастан дайындалат.

«Бул жөлөк пул үй-бүлөнүн социалдык-экономикалык абалына карабастан үч жашка чейинки бардык балдарга берилет», — деди Байгончоков.

Жаңы төлөмдү киргизүү тууралуу чечим президенттин 2026-жылдын 6-мартындагы жарлыгынан кийин кабыл алынган. Ведомствонун өкүлдөрүнүн айтымында, бул чара баланын жашоосунун алгачкы жылдарында үй-бүлөлөрдү колдоого багытталган.

Арызды «Түндүк» мобилдик тиркемесиндеги «Социалдык төлөмдөр» бөлүмү аркылуу, ошондой эле Эмгек министрлигинин аймактык бөлүмдөрүнө кайрылып тапшырууга болот.