Корея бийлиги эмгек мигранттары үчүн тил сынактарын күчөтүүдө
Түштүк Корея Employment Permit System (EPS) программасы боюнча эмгек мигранттары үчүн корей тилин билүү талаптарын күчөтүүдө. Эми негизги басым иш нускамаларын түшүнүүгө, коопсуздук эрежелерин сактоого жана жумуш темалары боюнча баарлашууга жасалат. Бул тууралуу Эмгек жана иш менен камсыз кылуу министрлигине караштуу Human Resources Development Service of Korea агенттиги билдирди.
Мекеме E-9 визасына талапкерлер үчүн маектешүү жана кесиптик тестирлөө жол-жоболорун кайра карап чыгып, баллдык система боюнча жаңы баалоо критерийлерин киргизди.
Чечим кореялык иш берүүчүлөр арасында жүргүзүлгөн сурамжылоонун жыйынтыгына байланыштуу кабыл алынды: компаниялардын дээрлик жарымы чет элдик кызматкерлердин жумуш көрсөтмөлөрүн түшүнүүдө (48,9%) жана коопсуздук талаптарын аткарууда (37,6%) кыйынчылыктар бар экенин белгилешкен.
Мындан тышкары, реформаны өндүрүштөгү кырсыктардын өсүшү да шарттады. Чет элдик жумушчулар өлкөнүн жалпы жумушчу күчүнүн болжол менен 3,4%ын түзгөнү менен, өлүмгө алып келген кырсыктардын үлүшү жогору: 2022-жылы — 9,2%, 2023-жылы — 10,4%, ал эми 2024-жылдын биринчи жарымында — 11,8%. Изилдөөлөргө ылайык, чет элдик жумушчулар арасындагы өлүм көрсөткүчү кореялык жарандарга караганда 2–3 эсе жогору.
Жаңыртылган система боюнча маектешүүнүн салмагы жогорулайт, экзамендер жумуш буйруктарын түшүнүүнү, кесиптик лексиканы жана эмгекти коргоо эрежелерин текшерет. Ошондой эле кесипке жана иш шарттарына байланышкан суроолор көбөйтүлөт. Бардык тармактар үчүн корей тили боюнча минималдуу өтүү балы жогорулатылат.
Жаңы талаптар 2026-жылы күчүнө кирет жана EPS программасына катышкан 17 өнөктөш өлкөгө жайылтылат. Бул программа жергиликтүү жумушчу күчү жетишсиз болгон шартта чакан жана орто ишканаларга чет элдик адистерди тартууга мүмкүнчүлүк берет.
Мындан тышкары, өлкөгө баргандан кийин да тилдик колдоо күчөтүлөт. E-9 визасы менен иштегендер үчүн окуу китептерине тармактык өзгөчөлүктөрдү эске алган материалдар, жумуш жайларынын сүрөттөрү кошулат, ошондой эле реалдуу эмгек шарттарына жана коопсуздук эрежелерине багытталган жаңы сүйлөшүү куралы иштелип чыгат.