Курулуш министри 1960-жылдары курулган имараттар тарыхый баалуулукка ээ эмес деп эсептейт

Курулуш, архитектура жана турак жай-коммуналдык чарба министри Нурдан Орунтаев Бишкекте реновация жүргүзүү сөзсүз болорун билдирди.

Анын айтымында, министрлик учурда тиешелүү программаны иштеп чыгууда.

Эски имараттарды бузуу маселесине токтолгон министр 1960-жылдары курулган көптөгөн типтүү имараттар тарыхый баалуулукка ээ эмес экенин белгиледи.

Орунтаевдин айтымында, сөз биринчи кезекте убакыттын өтүшү менен эскирип, адамдар үчүн кооптуу болуп калышы мүмкүн болгон турак үйлөр, ооруканалар жана башка имараттар тууралуу болуп жатат.

Министр совет мезгилинде курулган айрым архитектуралык объектилерди сөзсүз сактап калуу зарыл экенин белгиледи. Мисал катары ал Опера жана балет театрынын имаратын, Ак үйдү, Айыл чарба министрлигинин имаратын жана башка объектилерди атады.

Ошол эле учурда, анын айтымында, техникалык себептерден улам сактап калууга мүмкүн болбогон имараттар да бар.

«Адам тарабынан курулган бардык нерсенин кызмат өтөө мөөнөтү болот. Ар бир имарат убакыт өткөн сайын эскирет. Айрымдарын реставрациялоого мүмкүн болсо, кээ бирлерин калыбына келтирүү мүмкүн эмес», — деди министр.

Орунтаев ошондой эле айрым эски үйлөрдө олуттуу техникалык көйгөйлөр бар экенин айтты. Анын айтымында, айрым имараттардын жабуулары жүктү көтөрө албай калган, дубалдары урап жатат, ал эми кээ бирлери тургундардын өмүрүнө коркунуч жаратышы мүмкүн.

Министрдин айтымында, көптөгөн «сталиндик» үйлөрдө толук кандуу пайдубал жок болгондуктан, алар өзүнүн салмагынан улам кулап калуу коркунучуна туш болушу мүмкүн.

Мындан тышкары, министр көп кабаттуу турак үйлөрдүн фасаддарын оңдоо маселесине да токтолду. Ал фасаддар батир ээлеринин жалпы менчиги болуп эсептелерин белгилеп, аларды күтүү жана оңдоо боюнча негизги жоопкерчилик биринчи кезекте муниципалитетке эмес, батир ээлерине жүктөлөрүн айтты.