Балдар интернетте кандай коркунучтарга кабылат?

Бүгүнкү күндө интернет балдардын жашоосунун ажырагыс бир бөлүгүнө айланып калды. Алар ал аркылуу окушат, ойношот, достор менен сүйлөшүшөт. Бирок анын пайдалуу жактары менен катар, этияттыкты, сак болууну талап кылган коркунучтар да бар.

Алардын негизгилери:

♦Кибербуллинг (интернеттеги зомбулук)

• Башкалар тарабынан кемсинтүү, мазактоо же коркутуу.
• Социалдык тармактарда, оюн платформаларында же билдирүү жөнөтүүчү колдонмолордо болуп өтөт.

♦ Балдарга арналбаган (жашка ылайык эмес) контент

• Зомбулук, порнография же коркунучтуу темалардагы видеолор, сүрөттөр же маалыматтар. Бул баланын психологиясына терс таасир тийгизиши мүмкүн.

♦ Онлайн "жырткычтар" (педофилдер жана башка зыяндуу адамдар)

• Өзүн жаш бала же ишенимдүү адам катары көрсөтүп, балдар менен достошуп, кийинчерээк жолугушууга же башка кооптуу иштерге үндөшөт.

♦ Шылуунчулук жана алдамчылык

• Жалган байгелер, оюндагы шектүү сатып алуулар же купуя маалыматтарды (мисалы, сыр сөздөрдү) сураган шылуундар.
• Алар банктык маалыматтарды колдонуп, акчаны уурдашат.

♦Купуялуулуктун бузулушу

• Балдар өздөрү тууралуу өтө көп маалымат бөлүшүшү мүмкүн (аты-жөнү, жашаган жери, мектеп ж.б.). Бул маалыматтар жаман ниеттеги адамдардын колуна тийиши мүмкүн.

♦Интернет көз карандылыгы

• Балдар көп убакыттарын телефон, планшет, же компьютерде өткөрүп, чыныгы жашоодон алыстап кетиши мүмкүн.
• Окууга, уйкуга же үй-бүлөлүк мамилелерге терс таасир берет.

♦Шектүү оюндар жана кооптуу чакырыктар

• Балдарды кооптуу иштерди кылууга үндөгөн интернет “челлендждери”.
• Айрым учурларда бул өмүргө коркунуч жаратышы мүмкүн.