Ош облусунун 158 миң тургуну таза ичүүчү суу менен камсыз болот
Ош облусунун 158 миң тургуну таза ичүүчү суу менен камсыз болот. Бул тууралуу Айыл чарба министрлигинен кабарлашты.
Маалыматка ылайык, бүгүн, 1-июнда Кыргыз Республикасынын расмий делегациясы тиешелүү тармактык ведомстволордун жетекчилеринен турган курамда Евразиялык турукташтыруу жана өнүктүрүү фонду (ЕТӨФ) менен Ош облусунун калкын таза ичүүчү суу менен камсыз кылуу долбоору боюнча сүйлөшүүлөрдү өткөрдү.
Долбоор региондогу эң курч көйгөйлөрдүн бирин чечүүгө багытталган. Ал Кара-Суу жана Өзгөн райондорундагы 32 айылдын тургундарын камтыйт. Учурда бул аймактарда 158 миңге жакын адам 1950–1980-жылдары курулган эски суу түтүк системаларын же коопсуз эмес суу булактарын колдонууга аргасыз.
Ош облусу өлкөдөгү калкы эң жыш жайгашкан аймактардын бири болуп саналат. Ошол эле учурда сапаттуу ичүүчү сууга жеткиликтүүлүк деңгээли чектелүү бойдон калып, болжол менен 65 пайызды түзөт.
Бул көйгөйдү чечүү үчүн Фонд жалпы бюджети 66,7 миллион АКШ долларын түзгөн долбоордун алкагында 60 миллион АКШ доллары өлчөмүндө насыя берет. Өз кезегинде Кыргызстан 6,7 миллион АКШ доллары көлөмүндө кошумча каржылоону камсыздайт.
Долбоордун алкагында инфраструктураны масштабдуу жаңылоо каралган: 890 чакырымдан ашык суу түтүктөрүн жана бөлүштүрүү тармактарын куруу жана жаңылоо, 33 артезиан скважинасын бургулоо, 54 резервуар куруу жана 11 насос станциясын орнотуу пландалууда. Бул иштер калкты туруктуу жана коопсуз ичүүчү суу менен камсыз кылууга мүмкүндүк берет.
Мындан тышкары, долбоор санитардык шарттарды жакшыртууну да камтыйт: мектептердеги, бала бакчалардагы жана фельдшердик-акушердик пункттардагы 95 санитардык түйүн жаңыланат.
Долбоорду ишке ашыруучу агенттик катары Суу ресурстары, айыл чарба жана кайра иштетүү өнөр жайы министрлигине караштуу Ичүүчү суу менен камсыздоону жана саркынды сууларды чыгарууну өнүктүрүү департаментинин Долбоорлорду ишке ашыруу тобу аныкталды.
Долбоорду ишке ашыруу мөөнөтү макулдашуу күчүнө кирген күндөн тартып 5 жылды түзөт. Документке кол коюу 2026-жылдын июнь айынын аягына чейин пландалууда.
Бул долбоор аймактагы калктын жашоо сапатын жакшыртууга жана заманбап суу менен камсыздоо системасын өнүктүрүүгө багытталган маанилүү кадам болуп саналат.